Carballeira do Restollal, ao fondo do parque de Eugenio Granell (zona do Paxonal), completamente allea ao balbordo da cidade.
Carballeira (cast. carballeda ou robledo) ás beiras do río Sar, situada no actualmente coñecido como parque de Eugenio Granell (zona do Paxonal). Situada ao fondo do parque, en dirección a Conxo, esta carballeira mantén o silencio, a paz e a calma que se respira nas carballeiras escondidas dos nosos bosques atlánticos nas áreas rurais; tanto é así que, a pesar de estar preto de lugares tan concorridos como a estación de tren, a avenida de Lugo ou o Hospital Provincial de Conxo, lograrás escapar do balbordo da cidade.
Parque Eugenio Granell (O Paxonal )
Inaugurado no ano 2003 e homenaxeando o ilustre pintor surrealista galego, o parque de Eugenio Granell está situado ao sueste da cidade e conta con máis de 130.000 metros cadrados dedicados á natureza. Este parque é un dos principais pulmóns dos barrios de Pontepedriña, O Castiñeiriño, Conxo e O Ensanche. Ademais das súas espectaculares vistas sobre a cidade, nel destaca a súa configuración: as zonas axardinadas e de prado van dando paso, aos poucos, a un frondoso bosque de carballos á beira do río Sar combinado cun bosque de ribeira moi ben conservado.
A diversidade botánica do parque de Eugenio Granell ofrece, en cada época do ano, unha enorme variedade de cores e texturas. Nel poderemos atopar tres zonas vexetais perfectamente diferenciadas:
A carballeira do Restollal é un lugar idóneo para gozar da natureza, xa sexa coa simple contemplación, paseando, xogando, explorando, facendo exercicio… Non dubides en deixarte levar polo verdadeiro significado do termo descanso á sombra dos carballos e da vexetación de ribeira nas marxes do río Sar!
Entre a carballeira e o río atoparás unha área especial para gozar da compañía da túa peluda ou peludo, un espazo onde a túa mascota pode permanecer ceibe, correr e xogar con total liberdade.
Se queres gozar do parque de Eugenio Granell en toda a súa amplitude, os seus camiños ofrécenche un percorrido ideal, con tres miradoiros nas súas zonas altas desde onde obter unha fermosa panorámica tanto de Santiago como dos montes que o rodean. Estes tres lugares destinados especificamente á contemplación son espazos inseridos nos camiños, de forma semicircular, presididos por unha fonte e dotados de mobiliario urbano como bancos e papeleiras.
Se o teu é o deporte, estás de sorte, pois o parque conta con diversas zonas acondicionadas para a práctica deportiva, incluíndo unha pista de skate para a mocidade e maiores, tres plataformas para exercicios físicos ao aire libre e máquinas de exercicios biosaudables, así como camiños peonís e un carril bici pola marxe do río Sar.
E se queres algo máis tranquilo ou familiar, contas con zonas axardinadas nas que repousar en compaña dos teus seres queridos, unha cafetaría onde tomar un café con bonitas vistas ou un parque de xogos infantís onde pasar unha tarde inesquecible coas crianzas da familia.
Ademais, o parque acolle diversas actividades programadas ás que tamén te podes apuntar, como ciclos de cinema ao aire libre, concertos ou competicións deportivas.
